Senin, 29 Juni 2009

cakap mudo untuk batandang anak jambi adat resam budayo kito



CAKAP MUDO NAK BATANANG

1.kaiko ko datang dahi mano? Nak kamano ??

Kami ko dik datang dahi lubok nan idak banamo, luhah nan idak bagelo, bukit tinggi lah kami daki bukit nan idak di tempuh angin ,luhah dalam lah kami tuhun, luhah nan idak di tuhut ayek.
Antau batuah lah kami renang ,laut nan sakti lah kami layar, empang bendung lah kami Bengal ,empang batu lah kami kalek, empang unak lah kami ateh, dek mancahi jejak nan tatakuk lamo.
Anut nan tarentang sejak bari mancari sanak. Sanak nan bakal kasih, suku kampong nan bakato sayang, manuhut kabar nan dibaok angin, barito nan dibaok burong disiko lah umahnyo

.2, kaiko datang kasiko tadi naik apo ?? pakai apo ?? apo pakai biduk , mutor , sapeda , apo mubel nian ?
jawab; iyo dek kami datang serempak kilat ngan badeleh serempak angin nan batiup.

3. kaiko ko bang … uhang sesat di imbo kamu sesat di dusun apo dak salah tuju ??
j
Mun itu nan adik tanyokan iyo jugo itu dek, idak dek kami idak tasesat salah jalan, tadorong salah simpang idak pulo kapatah titin idak pulo kapadam suloh, kami idak batitin batang pisang kami batitin kayu bulin , kami idak basuloh bulan bintang kami basuloh matohari .
Kok rajo nan adek tanyokan iyolah bungo padi, kok rajo burong iyolah bungo kayu, batang nan talangkah lah lapok, daun nan tapijak lah luluh.
Sejak salangkah maninggalkan bendul , satakak maninggalkan tango, sabahu maninggalkan laman ` kasiko nian tujuan kami,.

4.apo dak salah naik bang ko umah sanak pameman jugo umah sanak puyang kito ko agi sarumpun bang..
j
kok itu nan adek tanyokan , samolah kito ko dek , kok ninek samo di imbau puyang samo di seru, agi sarumpun bak serai , agi sainduk bak ayam agi salingkung dalam aur nan sarumpun dalam kato nan salapih.
Tampo adik kami meraso hino dengan kedatangan kami iko, maklumlah anak dagang dalam suku, anak galeh dalam kampong, takut tagisel keno miang, tagagai keno beh.

5.kok macam itu apo nian tujuan abang datang ka umah kami ko bang ??
j
kami ko dik nak mencubo maok gaham barenang, kok sampai talentang tangan kok idak talungkup tangan.
Nak ngajak adik bausik sireh, bamain pinang. mambuek jalan
Mambuek titin dapo rajo manyusun jalan kaparuntong, kok ado paruntong nan baimbau parajo nan baseru.
6. apo iyo nian bang apo abang tu idak salah kato?? Apo idak talajak cakap ??
j
kalu itu nan adek tanyokan iyo… itulah nan Sabena kato, bagi kami ko dek, belum diagih lah di agak, lom di titi lah di pijak, kok luko idak meraso pedih, mati idak meraso sedih.
Imat lah sudah, kaji lah tamat .
Kini ko kok iyo disiko sanak bakato kasih suku nan bakato sayang, kok kecik kami nak baserah taho gedang kami nak baserah diri

7.kami ko uhang jad bang ehh apo nya nan di tingok pado kami ko..
j
kalu kami celik pado upo ,pandang pado uman itu ado dik.
Kito barentak diateh nan banyak bakiro diateh nan ado , kalu takut tajual pagi cmeh tagadai petang yo jangan….
Maklumlah kami ko nan bak kato uhang , anak dagang dalam suku anak galeh dalam kampong, sesak bukan sabuah , malang nan idak satu , kok maleh jangan di kayay dek..

8 kalu cam itu kato abang iyolah bang kami taimo dengan hati nan babungo2. tapi minum jugo ayek kami, cibit jugo kue nang kami ulo.
j
tarimo kasih dek .. kini senang raso hati tenang raso jiwo.kiro2 kasih nan nyato sayang lah nampak. Cuman ado pantun uhang tuo sarambah anak mudo’
makan kerak batimpo kerak
makan kuah pati santan
bia tajela bia tacipak
idak di pasilo idak dimakan

9 iyo bang kami pasilo nian ngicap kuengan ayek dumah kami.
J
Kalu dipasilo yo abang tarimo lah tarimo kaseh banyak.

9 bang kok iyo sabenan iyo apo bukti nan kami pegang apo tando nan kami kenang ?

J jangan cmeh dik , dikapak pasti batimbal ,gayung pasti basambut ,kalu nan sahari ado sahari banamo. Sahari ado sahari bagelo iyo idak ado dek.
Tunggu kami balek dulu . insaallah babarapo hari kami datang agi.

10 kalu cam itu iyalah bang .

j.kini ko dik mangingat ahi larutmalam ayik lah di minum kue lah di makan, percakapan kito lah selesai , izinkanlah kami mangurak langkah mangilo surut kami nak balek kaumah kami .

11 iyolah bang , jangan pulo basurut langkah abang dahi umah kami bapindah pulo cinto ka yang lain .

baiklah dik kalu untuk itu dengapulo pantun kami;
jangan cmeh minyak tabayak
kapayang agi babungo
jangan cmeh kasih baranjak
kaseh pado kau salamonyo.



TUTOR; A RAHAMAN

3 komentar:

  1. tulung buek carito dusun yang lucu-lucu nco....
    ladeh jg dikit maco....

    BalasHapus
  2. ak dak tau nco nak ngisi blog ak....
    cam manon caro......

    BalasHapus
  3. hahha gani mudah coo kawan buk bee posting kawan ka siko yooo

    BalasHapus

PENDAPAT KAMU ??